Kreu i Partisë Demokratike Lulzim Basha gjatë vizitës në qytetin e Vlorës, është ndalur në një takim dhe me aktorin e madh Bujar Asqeriu, i cili në krye të listës së kërkesave për Bashën, vendosi ndërtimin e Teatrit Kombëtar, pasi sipas tij sot arti është në ditët më të zeza.
Teksa kishte një tensionim, të natyrshëm për karakterin e tij, Asqeriu bëri kritika të forta dhe në drejtim të kryeministrit Edi Rama, ndërsa shtoi se ka urrejtje për artistët.
Pjesë nga biseda e Asqeriut me Bashën:
Asqeriu: Po ndjekim me shumë vëmendje gjithë këtë fushatë që duhet të kthehet në një festë të madhe për popullin shqiptar. Të gjithë në votime me dëshirën kënaqësinë dhe vullnetin që me votën e tyre të vendosin fatin e tyre. Dhe duhet të zgjedhin mes sundimtarit. Në Shqipëri duhet të jetë populli zot i detit tokës dhe ajrit. Dhe pushteti duhet të jetë i popullit që ka djersitur kaq shumë dhe është shumë i pakënaqur nga politika shqiptare.
Ndaj duhet të merrni drejtimin e vendit për këta vajza dhe djem që duhet të punojnë për të ardhmen e vendit. Unë i kam ndërtuar me punë dhe djersën e ballit, dhe dua që cdo shqiptar ta shikojë të pasur dhe të lumtur dhe të jetë zot i familjes së tij dhe i pronës së tij.
Basha: Respekti që ka Vlora dhe Shqipëria për ty. Shpeshherë njerëzit e lidhnin atë figurë historike me njeriun që e mishëron në art
Asqeriu: Prandaj artistët në përgjithësi janë të pakënaqur nga politika sepse politika nuk ka investuar për artin. Dhe një teatër e rrafshuan. Tirana nuk ka teatro. Duhet të kishte 10 të tillë. Ndaj nesër i nderuar zoti Basha, teatrin ta cconi atje ku ishte, sepse aty është fryma e atyre që nuk jetojnë dhe nuk do jetojnë nesër. Teatri është demokraci është shenjtëri. Ai i madhi, Zoti, shikon cdo gjë. Ata që e kanë prishur kanë bërë një gjynah të madh.
Basha: E kanë bërë për një aferë korruptive. E kanë bërë nga kompleksi. Ju keni shkrirë jetën tuaj për atë teatër dhe duhet të sigurojmë që brezat e ardhshëm të jenë ndryshe.
Asqeriu: Dhe urrejtje për artistët. Është një komb pa shpirt. gjithë ata që kanë vënë dorë mbi pronën dhe paratë publike dhe kanë mbushur xhepat dhe kanë transferuar para të shkojnë para ligjit. Dhe këtu duhet të ketë drejtësi. Ndryshe nuk bëhet ky vend.
