Kanë dalë rezultatet paraprake të zgjedhjeve për kryetarin e ri të Partisë Demokratike, ku rezulton se Lulzim Basha, kryetari aktual, është në avantazh të dukshëm thuajse në të gjithë vendin.
Në rang kombëtar, nga rezultatet paraprake Lulzim Basha ka arritur të marrë 80% të votave të demokratëve, ndërsa Agron Shehaj ka marrë 15,55%, Harxhi 2,45% dhe Fatbardh Kadilli 2%.
Në një deklaratë për mediat, kryetari i komisionit zgjedhor në PD, Jemin Gjata, u shpreh se ditën e hënë rezultati do të zyrtarizohet.
“E dhëna zyrtare do të dalë vetëm nesër paradite, pasi ne të kemi administruar të gjitha kutitë e votimit, të cilat do të hapen në komision në praninë tuaj po të doni, nesër pas orës 09.00, do të nxirren procesverbalet, do të regjistrohen procesverbalet një përmbledhëse. Do të shpallet rezultati zyrtar i kandidatit fitues dhe të dhënat prej secilit prej kandidatëve në garë. Janë mbyllur të gjitha degët e votimit. Nuk ka patur incidente. Presim të na deklarojnë kundrejt fotokopjeve procesverbale dhe ne do t’ju deklarojmë ju një të dhënë operative paraprake”, tha Gjana.
