Rigoroziteti në mbajtjen e maskave dhe respektimin e masave kundër Covid 19, ka përplasur ish-kryeministrin Sali Berisha dhe ministren e Shëndetësisë, Ogerta Manastirliu.
Berisha ka publikuar në Facebook, një foto nga mbledhja e Komitetit me ministren. Teksa e quan Manastirliun “ndrikull Hajnia”, ish-kryeministri thotë se në këtë takim nuk mbahet as maska dhe s’ruhet as distancimi social.
“Ne zyrën e ndrikull Hajnise ndalohet maska dhe distanca sociale?!?!”, shkruan ish-kryeministri Sali Berisha.
Menjëherë ka reaguar ministrja Ogerta Manastirliu, e cila në një postim në Instagram, e quan Sali Berishën “Doktor Vdekja”. Sipas saj, fotoja e publikuar nga ish-kryeministri është e datës 8 mars 2020, kohë kur sapo kishte nisur pandemia.
“Doktor Vdekja ka marrë një fotografi timen me Komitetin Teknik të Ekspertëve. Siç mund të verifikohet kollaj në Instagram, fotografia është e datës 8 mars 2020. Domethënë, është shkrepur në një ditë kur në Shqipëri nuk kishte as edhe një rast të konfirmuar me Covid-19.
Doktor Vdekja, siç bën shpesh këto kohë, e ka marrë dhe e paraqet si fotografi të këtyre kohëve.
Eshtë thjesht GËNJESHTËR.
Respekt për punën e Komitetit të Ekspertëve. Neveri për Doktorin e Vdekjes dhe të gjithë adhuruesit e katastrofës”, shkruan ministrja e Shëndetësisë.
