“River side” ose “Bregu i lumit” është projekti që ka nisur sot në kantierin e parë të një nga lagjeve të reja të Tiranës. Ministri i Rindërtimit, Arben Ahmetaj tha se “Zona e 5 Majit, e stigmatizuar dikur si bregu i lumit do kujtohet si një simbol i ndryshimit të madh”.
“Do jetë një nga lagjet më moderne që do ketë kryeqyteti, e jo vetëm. Kjo është shumë më shumë se një lagje, e konceptuar si një qytet më vete ku do akomodohen 11 mijë familje. S’do jetë një koncept i një lagje të lënë pas dore në periferi të Tiranës por do jetë një nga 4-5 qendrat e reja të qytetit”, theksoi Ahmetaj.
Sipas ministrit të Rindërtimit, në këtë kantier do angazhohen mbi 1600 të punësuar.
Ahmetaj bëri me dije gjithashtu se në këtë zonë do të jetë ndërtesa e përbashkët e Tatim-Doganave dhe një gjimnaz i ri.
Ndërsa kryebashkiaku i Tiranës tha se për këtë projekt do të punohet me tre turne, premtoi se brenda disa muajsh do të shpërndahen shtëpitë e reja për familjet e dëmtuara nga tërmeti i 26 nëntorit, por jo vetëm.
“Kjo lagje e projektuar nga arkitekti i famshëm italian Stefano Boeri, e cila do të ndërtohet nga themelet për 11 mijë banorë, do të kthehet në një qendër të re policentrike të Tiranës, me një qasje të re të zhvillimit urban, ekonomik e social, me infrastrukturë moderne dhe akses të garantuar në shërbime cilësore publike e private, nga shkollat e kopshtet tek njësitë tregtare, me parqe e mjedise sportive, si edhe institucione shtetërore“, shkruan kryeministri Rama në Facebook për këtë projekt.
