GJKKO ka caktuar datën 27 korrik për të shqyrtuar kërkesën e SPAK për gjykimin e ish-ministrit të Mbrojtjes Fatmir Mediu.
Më herët ishte Gjykata e Lartë ajo që shpalli moskompetencë mbi kërkesën e SPAK për të nisur hetimet ndaj ish-ministrit të Mbrojtjes, Fatmir Mediu lidhur me ngjarjen e Gërdecit në vitin 2008.
Kështu Gjykata e Lartë ia kaloi çështje Gjykatës së Shkallës së Parë Kundër Krimit të Organizuar dhe Korrupsionit, GJKKO.
Do të jetë kjo e fundit që të shprehet nëse duhet të mbetet i pushuar procesi ndaj Mediut, apo duhet të rihapet nëse ka prova të reja.
Gjykata e Lartë kishte vendosur të pushojë çështjen ndaj Mediut pasi ai kishte imunitet dhe prokuroria nuk kishte marrë autorizim.
Por ndryshimet ligjore të vitit 2012 dhe 2017 kanë ndryshuar imunitetin parlamentar të të zgjedhurve, ndaj ndjekjeve penale, hetimit apo gjykimit të tyre.
Mediu u akuzua në atë kohe për shpërdorim detyre, në lidhje me shpërthimin e municioneve në fabrikën e demontimit në Gërdec.
Një nga familjarët, Zamira Durdaj, e cila humbi të birin, kallëzoi në SPAK ish-ministrin e Mbrojtjes, Fatmir Mediu.
Shpërthimi në fabrikën e demontimit të armëve në Gërdec, shkaktoi vdekjen e 26 personave, plagosjen e rëndë e 27 personave, plagosja e lehtë të 109 të të tjerëve.
