Dje, më 28 mars u bënë plot 24 vite nga tragjedia e ndodhur në ngushticën e Otrantos, ku humbën jetën dhjetëra emigrantë shqiptarë. Në orën 3 të mesditës nga Porti i Vlorës u nis anija e vjetër “Katër i Radës” me 115 emigrantë në bord, në drejtim të Italisë.
81 persona humbën jetën në tragjedi, rreth 27 u konsideruan të zhdukur, ndërsa 34 të tjerë fatmirësisht mbijetuan.
Aktorja dhe studiuesja e gjeopolitikës, Ermelinda Birçaj ka qenë nismëtare për organizimin e një projekti që mban emrin e anijes famëkeqe “Katër i Radës”, për të nderuar kujtimin e atyre që humbën jetën në këtë tragjedi.
Për Ermelindën, kujtimet e kësaj tragjedie nuk do të shuhen asnjëherë, sepse ajo humbi 6 familjarë. Ndonëse me kalimin e viteve ka ndërtuar familjen e saj me dy fëmijë dhe me bashkëshortin italian, përsëri ajo e kthen kokën pas dhe vjen në Vlorë sa herë që ka mundësi.
Në një lidhje Skype për “Ëake Up”, ajo ka rrëfyer se sa herë vjen në Shqipëri shkon të vizitojë varret e viktimave të tragjedisë së Otrantos.
“Në jetën time kam shumë kujtime. Katëri i Radës është aty para meje dhe e kam gjithmonë. Gjyshi më ka mësuar që e vogël që çdo të diel të shkojmë në varreza dhe të pastrojmë varret e braktisura dhe jo vetëm të familjarëve tonë.
Sa herë vij në Shqipëri në Shqipëri, në Vlorë, shkoj në varreza. Shkoj i takoj të gjithë të mbyturit e Otrantos, më vjen shumë keq. Më ka ardhur shumë keq para 5 viteve që i gjeta të braktisura varrezat. Memoria është gjë e rëndësishme, nuk duhet të lihen në atë gjendje varret. Të kujtojmë ata që nuk marrin dot frymë, ata që ulërijnë në fund të detit”, u shpreh Ermelinda.
